IL RACCONTO dell'ALPINO di Ugo Suman

Na data, quela de ancò, che tanti dei ansiani che naviga oltre la setantina ricorda ben, parchè la fa parte de la nostra gioventù e de la nostra storia: la marcia su Roma.

Naturalmente la gera na festa nassionale imposta e regolà dal regime de quel tempo. Se passava la giornata in divisa, da balilla, da avanguardisti, e via discorendo. Se partecipava a sfilate e se scoltava discorsi a tema fisso: la Patria e chi la dirigeva.

A sto proposito me vien in mente che quando nei ani sinquanta, al festival de Sanremo i ga presentà “Vecchio Scarpone”, na canson de impianto alpino che ricordava la guera 1915-18, serti politici del tempo la ga censurà. Come se la guera, la prima e la seconda co i so milioni de morti, no ghe fosse sta. Solo che la zente comune, ga dimostrà più bon senso e anche più bon gusto, de tanti politici de quel tempo, e la ga avù el sucesso che la se meritava.
Ma fora de ogni considerassion che pol essare giudicà polemica, vorìa ricordare un omo de quel tempo, na figura particolare che se definiva solo un soldato, un alpin. Cinque ani de naja e quatro de guera su le trincee del Carso, de la Marmolada, del Grapa: ferito sensa medaja, co un picolo sussidio de riconossimento. Noi ga mai volesto saverghene del novo partito, anche se par tanti el gera diventà na moda, nei ani trenta, lu xe restà sempre e solo un alpin.

La canson che gavemo nominà prima “Vecchio Scarpone" racontava la so storia, e lu ne ripeteva de continuo e sotovosse le parole come de na poesia. Ei gaveva un tricolore de proprietà co lo stema reale, chel diseva de averlo rancurà fra i morti ne la ritirata de Caporeto. Co sta bandiera in spala, come un qualunque atresso agricolo da lavoro, el partecipava a tute le feste nassionali dove se ricordava i caduti (el quatro novembre) el massimo giorno del ricordo. El partecipava sempre par ultimo sensa inquadrarse co nesun, el se portava più vissin che ghe gera possibile al monumento dei caduti, che lu considerava un tabernacolo e, co la bandiera
in asta, el pianzeva in silensio ricordando i so comopagni.

La zente lo considerava “strambo” par no dire mato, ma forse nol gera nè l'uno nè l’altro. Nol se gaveva sposà, pur essendo un bel omo, come diseva la zente, forse parchè la guera e le tribolassion lo gaveva squillbrà. Opure
nol gaveva trovà la sò anima zemela, el viveva in fameja co i genitori e i fradei.

Durante l’ultima guera el se ga aruolà fra i volontari che andava a rancurare i feriti soto le macerie dei bombardamenti a Padova. Dopo la liberassion nol ga aderìo a nessuno dei novi partiti che spuntava come funghi: el so unico partito gera l’Italia. Ormai no ghe gera restà che do feste a l’ano par portare la so bandiera, sempre quela, davanti al monumento dei caduti: el 25aprile el 4 novembre. Nessuno lo ga mai ostacolà nel so picolo rito privato in onore dei caduti par la Patria. Come altri omani soli, persa la fameja originaria l’è finio, ormai vecio e malandà, su na Casa de Rinoso.

Unica preocupassion: la so bandiera, quel tricolore rancurà fra i morti ne la disfata de Caporeto. Eil ga volesto che el prete col notaio se impegnasse, co
un documento scrito: la bandiera in dono a l’Ossario de Asiago, dove se custodiva i resti dei so compagni. L’ultimo desiderio: su la so fossa, soto a la crose sensa nome, i doveva scrivare: “Qua riposa un Alpin”.