NATALE 2009

Resta solo ricordi el me Natale,
quelo de sti ani no lo sento più:
el par na festa solo comerciale
dove riva par caso anche Gesù.

Quando el presepio gera povareto
co la fameja torno al fogolaro,
scaldà dal fogo e dal nostro afeto
e la so fiama ne faseva ciaro.

Me nono a capo tola ne vardava:
la so fameja ancora tuta intiera,
l’ocio contento che ne rimirava

come na tera zala de formento,
se recitava insieme na preghiera
par essar tuti là, in quel momento.

==============

Natale del presepio e de l’amore,
de la fameja e dei afeti veri,
inmagine che porto nel me cuore
e xe regina ancò, dei me pensieri.

Ugo Suman