EUGANEI

Zogava le stajon sui colli ameni,
el gran tesoro de la nostra tera,
e specialmente prima dei veleni
che ga desumanà quel che ghe gera.

La tera come scrigno de tesori:
d’inverno, col so velo de fumara,
de primavera l’esplosion dei fiori,
d’istà coi forestieri ancor piu cara,

e pò l’autuno co quei so colori,
de pampani, de foje e castagnari
che intabarava tuto de splendori

come i tramonti sconti dai filari
de vigne spetenà, e i primi odori
del mosto novo dentro i cantinari.

============

Un mondo perso, morto, butà via,
insieme a la so zente e i so valori:
el novo, fa vegner la nostalgia,
anche se i più xe diventà signori…